Casalderrey, Fina

Xosefa Casalderrey Fraga (máis coñecida como Fina Casalderrey) naceu no mes de agosto de 1951 no lugar de Pilarteiros, parroquia de Santo André de Xeve (Pontevedra). A súa infancia desenvolveuse nun ambiente rural e humilde, arredor das aldeas de Xeve e do lugar do Castelo, en Lérez. Comezou o bacharelato no instituto da Avenida de Montero Ríos e continuou no novo Instituto Feminino (antiga Escola Normal) onde rematou o bacharelato "elemental". Deseguido estudou maxisterio cando a Escola Normal xa fora trasladada á beira do río Lérez. Como docente, deu aulas en diversos centros públicos de ensino do país, até permanecer durante vinte e cinco anos deenvolvendo esta profesión no -daquela- Grupo Escolar Santa Lucía de Moraña e os dez últimos anos, previos á súa xubilación, no IES Illa de Tambo de Marín. Actualmente vive no lugar do Cruceiro, en Lérez. Diplomada en Lingua e Literatura Galegas pola Escola Oficial de Idiomas (Pontevedra), a súa vontade por achegar a escola á realidade, levouna a traballar, xunto co seu alumnado, en diferentes traballos pedagóxicos, así como en investigacións etnográficas, moitos deles premiados, no seu día por diferentes institucións e que, en parte, foron publicados polo Concello de Moraña en 2002 (Terras de Moraña: Unha realidade na historia, na lenda, na lembranza ...), baixo a coordinación de Mariano García. A maiores dos múltiples premios recibidos pola súa obra literaria, a nosa autora recibíu numerosos galardóns polos seus traballos relacionados coa pedagoxía; a etnografía; a gastronomía ... así como polas súas achegas xornalísticas.

A súa inxente obra literaria está centrada no ámbito infanto-xuvenil. Así, desde a novela Mutacións xenéticas (Vía Láctea, A Coruña, 1991) até a última, Icía quere cambiar o mundo (Parlamento de Galicia, 2015), van alá máis dunha cincuentena de libros, entre eles, os seguintes títulos: Dúas bágoas por Máquina (Xerais, 1992); A noite dos coroides (Vía Láctea, 1993); ¡Asústate, Merche! (Xerais, 1994); O misterio dos fillos de Lúa (S.M. Madrid, 1995); ¡Prohibido cassar, papá! (Galaxia, 1996); ¡ Puag, que noxo! (Editores asociados: Galaxia, 1997); Ás de mosca para Anxo (1998); O misterio do cemiterio vello (Ed. S.M, 1999); A máscara de palma (Galaxia, 2000); Un saco de estrelas (Xerais, 2001); Derradeira carta ós Reis Magos (Xerais, 2002); Lúas de nácara (Xerais, 2003); Eu son eu (Xerais, 2004); O meu avó é unha gata (Xerais, 2005); Isha, nacida do corazón (Rodeira, 2006); A lagoa das nenas mudas (Xerais, 2007); O misterio da casa do Pombal (SM, 2008); Fiz, o coleccionista de medos (OQO, 2009); Un saco de estrelas (Xerais, 2010); Un misterio na mochila de Alba (Oxford, 2011); Dúas letras (Galaxía, 2012); Historia da bicicleta dun home lagarto (Xerais, 2014); ...  De materia gastronómica son os ensaios Repostería en Galicia; Festas Gastronómicas de Galicia, ou O libro da empanada (publicados en Xerais, nos anos 1997, 1994 e 1993, respectivamente). Casalderrey é, ademais, autora de tres guións cinematográficos e outras moitas publicacións. En 1995 foi Premio Barco de Vapor e Premio Nacional de Literatura Infantil e Xuvenil pola obra O misterio dos fillos de Lúa. Dende novembro de 2013 forma parte da RAG (Real Academia Galega) como membro numerario. O seu discurso de ingreso levou por título: Viaxe á semente. Dende os refachos do corazón ata onde habita o imaxinario.